ذهب ولن يعد

فعلا راح وفعلا مش راجع تانى

راح لأنه ذهب لقدره

أيوة قدره اللى محدش هيقدر يرجعه تانى عنه

شاف الحقيقة

حقيقة دنيتنا

دنيتنا مش دايمة ولا هى دار بقاء

دنيتنا دى ابتلاء وتعب وفراق

الفالح فينا هيلحق يلم درجات

وياعينى عليه اللى هيطلع منها فقران

من غير صلاة ولا صوم ولا حتى قرآن

ياعينى علينا واحنا الموت بيلاحقنا

فى شغلنا وبره وجوة اوضتنا

دة ربنا قال: أينما كنتم يدرككم الموت ولو كنتم في بروج مشيدة

طبعا الآية مفسرة نفسها مش محتاجة تفسير

عارفين القصة دى

لما ذهب ملك الموت يسلم على سيدنا سليمان كعادته

ونظر كثيرا الى وزير عند سيدنا سليمان

وعندما خاف الوزير من ان يقبض روحه طلب من سيدنا سليمان ان يسخر له الريح لتحمله الى الهند

وعندما جاء ملك الموت في اليوم التالى سأله سليمان عليه الصلاة والسلام عن سبب نظراته للوزير

قال له ان الله تعالى امره بقبض روحه في الهند واستغرب تواجده عند سيدنا سليمان

هحكيلكم حكاياتى مع الموت

يوم من الايام كان ليا خالة كانت تعبانه جدا بقالها سنين امر ربنا انه يرحمها من الامها

ماتت الله يرحمها

تم اليوم ال39 من وفاتها فجأة لقينا خالتنا الصغيرة السليمة أمر ربنا إنه يلحقها بأختها

الله يرحمهم كلهم

وحش اوى الموت الفجأه بيوجع اوى

بس يا بخته اللى عمل حسابه قبل ما يموت ويجى يومه

يوم تانى كنت نايمة والساعة 7 الصبح لقيت حد بيقول ان جارنا مات

ازاى دة كان امبارح واقف وبيعمل ديكورات شقته الجديدة

اكيد مش هو ازاى يكون هو

طلع فعلا هو كان راجع من مشوار وعربيته انحرفت وتوفاه الله

متتخيلوش حزنى عليه اد ايه

الله يرحمه

المشكلة مش طريقة الموت

المشكلة في اذا كان الشخص دة كان بيعمل ايه قبل ما يموت

احنا عارفين ان الشخص مامات عليه بعث عليه

مثلا واحد مات وهو بيصلى يا سلام يحشر يوم القيامة بيصلى يا بخته

واحد مات وهو بيسمع اغانى ياويله الا اذا غفرله العزيز الغفار

القصص كتير وزعلت كتير وكلنا بنزعل

المهم ان احنا نستفيد

مهما فارقنا غالى وقريب لازم نفكر

عمل ايه قبل ما يموت

ممكن انا اموت زيه

طيب هتعب قبل الموت شوية يمكن ربنا يغفرلى فيهم ذنوبي ولا هموت فجأه

طيب هكون مؤدى فرضى ولا ناسيه

بتفرج على فيلم ولا على شيخ بيعطى درس

أسئلة كتير فعلا لازم نسألها لنفسنا قبل ما نموت

ربنا سبحانه وتعالى سمى الموت مصيبة الموت

والمصيبة دى هتلف علينا واحد واحد

وكمان ربنا قال: كل نفس ذائقة الموت

سبحان الله ع التعبير" ذائقة" سبحان الله

كمان حاجة عاوزة اقولها اننا هنقابل ربنا فرادى

عارفين يعنى ايه فرادى يعنى كل واحد لوحده

مفيش ماما تقول معلش دة كان تعبان ولا بابا يقول انا هشيل عنك

عملك اللى هيشفعلك

لو حطيت الموت ادامك وانك مش ضامن عمرك هيخلص امتى هتتقى الله وبجد هتعمل الخير لوجه الله

لازم تتذكر الموت في كل لحظة واعمل الخير

يا جماعة دة رسول الله صلى الله عليه وسلم مات يبقى احنا مش هنموت ونتغطى بالتراب

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الموت مش بيفرق بين طفل وشاب وعجوز

الموت حسب قدرك ومحدش فينا يعرف قدره امتى

اتقوا الله

اللهم اجعلنا من المتقين

ربنا لا تمتنا الا وانت راضٍ عنا

ربنا لاتزغ قلوبنا بعد اذ هديتنا

اللهم احشرنا مع النبين والصديقين والشهداء

اللهم اغفر لنا ذنوبنا وشفع فينا نبيك صلى الله عليه وسلم

اللهم اظلنا بظلك يوم لا ظل الا ظلك يا ارحم الراحمين

سبحانك اللهم وبحمدك اشهد ان لا اله الا انت استغفرك واتوب اليك

اتحشمى يا بنت

جت البنت الصغننة لماما وقالت: ماما يا ماما انا عاوزة البس الحجاب زيك

ليه يا حبيبة ماما انتى لسة صغننة ع الخنقة دى مش كفاية انا ظلمت نفسي بيه

وعدت شوية سنين....!!

ايه يا ماما مش هلبس الحجاب بقة؟!!

ردت ماما يا حبيبتى انتى لسة صغيرة وداخلة على سن الشباب والفرفشة

وعدت برده شوية سنين...!!

ماما انا في ثانوية عامة وعاوزة ربنا يسترها معايا هلبس الحجاب بقة

يعنى هو علشان ربنا يوفقك لازم تلبسيه ما بنت طنط تفيدة عايشة حياتها وفي طب

دخلت البنت الصغننة الجامعة و اتخرجت..!!

ماما انا زهقت انا لازم البسه بقه

ترد ماما اللى خايفة على بنتها مووووت مش لما تتجوزى؟!!!!

- حبت البنت تاخد موقف بقة -

طيب لومتجوزتش ياماما

ترد ماما الشر بره وبعيد يا حبيبتى

يا ماما بصى للامور صح انا سمعت كلامك كتير بس اكتر من كدة معدتش اقدر

ترد ماما دى اخرة تربيتى وخوفي على مصلحتك

ياماما مصلحتى في الاخرة

ماما مردتش عليها وخدت اللب والسودانى وفتحت التليفزيون

لقت مفاجأة برنامج عن الحجاب وفيه واحدة معترضة وبتحاول تقنع الناس انه مش فرض

طلعت ضيفة البرنامج تقول ان الايه في القران في سورة النور

((...وليضربن بخمرهن على جيوبهن...))

الجيوب دى يعنى منطقة ما تحت الرقبة وهى دى بس اللى تتغطى

ما صدقت ماما وجت جرى على الصغننة تبشرها

ردت البنت وقالت ماما هو ربنا موجود فين؟؟

اندهشت ماما وقالت في كل حتة

قالتلها وانتى بتصلى بتلبسي ايه؟

استغربت ماما وقالت اسدال بيغطى جسمى كله

طيب والحج والعمرة؟؟!!

بلبس حاجة تغطى جسمنا كله برده

ردت البنت وقالت بما ان الصلاة فرض والحج فرض وبنغطى فيهم جسمنا وشعرنا يبقى الحجاب فرض

ردت ماما مش فاهمة!!

قالتلها يعنى ربنا موجود معنا في الصلاه والحج وفي البيت واحنا ماشيين في الشارع

يبقى لازم نتقى الله في كل وقت

فكرت ماما شوية وحست فجأه بخيبة امل في نفسها وشعاع نور خارج من بنتها

افتكرت الاية

(( من يتقى الله يجعل له مخرجا..))

ـــــــــــــــــــــــــــــــــــــــــــــــــــــــــــــــــــــــــــــــــ

يا بنات يا مسلمات الحجاب فعلا فرض

والله ماهو خنقة ولا ضيق دى راحة نفسية

مفيش احلى من انك تنامى ليلة وانتى راضية عن نفسك

الوقت اللى تحسي فيه ان ربنا رضى عنك هتحسي ان الدنيا دى فعلا لا تساوى جناح بعوضة

تخيلى جناح بعوضة اللى بنجيب بخاخ ونرشها علشان هى مقرفة

اد ايه الدنيا متستاهلش اننا نضيع منها فرص النجاه

ياللى كل يوم بتقعدى تفكرى 100 مرة هتسرحى شعرك ازاى وهتقصيه ايه علشان ناس في الشارع ميستاهلوش انهم يشوفوا جمالك وجمال شعرك

تخيلى بقة لما بس اللى يستاهلك هو اللى يقدر يشوفه - اهلك اللى بتحبيهم وزوجك ان شاء الله -

تخيلى برده اد ايه ناس بيحاولوا يغضوا بصرهم عنك وغصب عنهم بتشديهم بهفهفة شعرك في الهوا

يللا يا بنات نحط ايدينا في ايدين بعض ونشد بعضنا ونلحق سوا مكان في الجنة ورضا ربنا علينا

يارب كلامى ميكونش تقيل ولو قدرنا ننشره يكون كويس

يمكن كلمة انا قولتها مش حاسة بيها بس جت واحدة حست بيها وعملت بيها ادخل بيها الجنة

ـــــــــــــــــــــــــــــــــــــــــــــــــــــــــــــــــ

..ذكر اليوم..

من قال حين يصبح او يمسى

اللهم إنى أصبحت( أمسيت) أشهدك وأشهد حملة عرشك وملائكتك وجميع خلقك أنك أنت الله لا إله إلا انت وحدك لا شريك لك وأن محمدا عبدك ورسولك

عتق من النار

السلام عليكم ورحمة الله

أهلا وسهلا بيكم في بلوجتنا المصونة بــنـــوتة

بما إن دة أول بوست لنا فحبينا نعرفكم على نفسنا

أنا بنوتة ومعايا أختى وحبيبتى توتا

الحقيقة إحنا مش أخوات شقيقتان إحنا أصحاب أكتر من أخوات

بلوجتنا دى بناتية ملتزمة شقية

قلنا إن دينا يسر وإن إحنا نقدر نوصله بطريقة سهلة وعلى أد علمنا

مع الاستعانة بذوى العلم

مش هنفــتى ولا هنــقول دروس إحنا هندردش مع بعض وهنتناقش

ونعلم بعض الغلط والصح

إن شاء الله هنكون كلنا أخوات

لو عجبتكم شرفونا بردودكم لو لا برده شرفونا بردودكم علشان نغير من نفسنا للصح

كلامنا برده مش كله على الدين

إحنا ممكن نتكلم عن أى حاجة تحبوها زى ما تقترحوا علينا

وأخيرا وليس اخرا

شرفتونا بزيارتكم

وأترك الميكروفون لتوتة

بس مش هقـفل المايك من غير ما أفكركم بأى ذكر كدة

**استغفر الله العظيم الذى لا إله إلا هو الحى القيوم وأتوب إليه**